Sal 93 / Hira 201 :1,2,3 / Vavaka / Mofonaina / Vavaka / Hira 543 1,3

Isaia 40, 27-31

Isiraely babo, manantena ny famonjen’ Andriamanitra no ampaherezina eto amin’izao Soratra Masina izao. Izay miandry ny Tompo dia mandroso hery satria :

1. Mahita ny fahorian’ny olony Izy (and.27-28)

Ambara eto fa Andriamanitra mahita ny zavatra rehetra, na ny miafina aza, amin’ny maha Mpahary Azy. Noho izany dia miharihary eo anatrehany ny fiainan’ny olona, indrindra ny fahoriana izay mianjady aminy any am-pahababoana. Nihevitra tokoa ireto vahoaka fa narian’ Andriamanitra. Voalaza eto anefa fa mandrakizay Izy, tsy miova amin’ny maha Andriamanitra Azy. Ahatsiarovana ny tamin’ny fanandevozana izay nilazan’ny Tompo hoe: « efa hitako tokoa ny fahorian’ny oloko izay any Egypta » (Eks. 3,7a). Koa matokia, fa hitan’ Andriamanitra ny ady izay atrehanao, aza kivy na very fanantenana fa aoka hibanjina ny fahalebiazan’ Andriamanitra satria tsy takatry ny saina tokoa ny fahalalany sy ny asany eo amin’ny fiainantsika vahoakany.

2. Manafy hery ny olony ny Tompo (and.29-31)

Eo am-pelatanan’Andriamanitra ny hery sy fahefana ary afaka manome amin’izay tiany hotolorana izany Izy. Babo ny Isiraely ka mety mieritreritra ho kely hery tsy afaka hitraka intsony manoloana ny Babyloniana. Ao anatin’izany indrindra no hamparehezan’ny Tompo ny olony fa raha matoky sy miandry ny famonjeny dia hanana hery sy tanjaka miavaka. Ohariny amin’ny voromahery ka hanehoany fa hery tsy mana-paharoa ary tsy misy fetra satria avy amin’llay maharitra mandrakizay. Ny Fanahy Masina no hery omen’Andriamanitra antsika ho entina miatrika ny karazan’olana sy ny asa rehetra. Hery tsy hay tohaina izany satria mahery indrindra. Koa ekeo ny fitarihany.

Fanontaniana:

Hery avy aiza no hiankinanao eo amin’ny fiainana?

Sampana Sekoly Alahady Foibe