(Sal 134 / Hira 194 / Vavaka / Mofonaina / Vavaka / Hira 334)

Filipiana 4. 1-9

Mifalia mandrakariva ao amin’ny Tompo (and. 4)

1. Tomoera tsara ao amin’ny Tompo

Mba hiray saina ao amin’ny Tompo i Syntike sy Eodia mirahavavy (and 2). Ampirisihana izy ireo hifanampy, izay efa mpiara-miasa tamin’ny Apostoly Paoly tamin’ny fitoriana ny Filazantsara (and 3). Ampaherezina izy ireo hiombom-po sy fanahy amin’ny fanompoana ny Tompo. Ambara ihany koa fa voasoratra ao amin’ny bokin’ny fiainana ireo mpiray dia amin’ny Apostoly. Foto-kevitra mivoitra izany: izay manaraka an’i Kristy, tahaka ny Apostoly, dia mpanaraka ny lalan’ny Apostoly koa ka voasoratra any an-danitra ao amin’ny bokin’ny fiainana (and 3; Apo 3.5; 21.27). Efa tsara toerana ao amin’i Kristy ny mpino ka ampaherezina mba tsy hiverin-dalana fa hitombo sy hiorina hatrany ao amin’i Kristy. Sady fonenantsika ao amin’i Jesoa Kristy no fitahiana rahateo.

2. Mifały ao amin’ny Tompo ny mpino

Sady fanaovam-beloma ataony amin’ny mpiray finoana aminy ny << mifalia mandrakariva (and.4) >> no fifaliana ara-bakiteny. Na dia any am-ponja aza ny Apostoly (Fil 1.7) dia mampirisika sy mampahery ny Fiangonana sy ny Kristiana. Efa akaiky ny Tompo. Izany no fanantenana, ka tsy andrenesana fahoriana na dia tafasaraka ara-nofo aza noho ny fanenjehana (and.5). Manambara ny toetra tokony hananan’ny olona miambina ny fiavian’i Kristy ny Soratra Masina: Mandefitra (and.5), afaka amin’ny fanahiana, mivavaka sy mifona; mankalaza sy misaotra an’Andriamanitra amin’ny zavatra rehetra (and 6). Arovan’i Jesoa Kristy ho amin’ny fiadanana ny mpino. (and 7). Noho izany hevero ny hatsaram-panahy sy fankalazana na ny fiderana an’Andriamanitra, mihoatra ireo zavatra sy fisainana heverina ho tsara rehetra. Raiso ho fianarana ny lalana sy ny fiainana nizoron’ny Apostoly.

Fanontaniana :

Afaka mifaly ao anaty fahoriana sy fahasahiranana ve isika Kristiana ankehitriny?

Sampana Sekoly Alahady Foibe